12 Ekim 1919 Tarihli İrade-i Milliye (Sivas) Gazetesi Sayfa 4

Hükümetin Beyannamesi Vatan ve memleketin elyevm geçirmekde olduğu şu buhranlı deverde hükümet-i hazıra Cenab-ı Hakk'ın tevkifat-ı ilahiyesine Peygamberimiz Efendimiz Hazretleri'nin ruhaniyet-i celilesine istinaden Padişahımız Hilafetpenah Efendimiz Hazretleri'nin teveccüh-i hümayunlarına ve Millet-i Osmaniyenin muzaheretine itimat ile mes'uliyeti der'uhde iderek sa'adet ve selamet-i mülk ve milleti te'min için azm-i kat'i ile ifa-yı vazifeye mübaşeret etmiştir. Hey'et-i vükela-yı hazıra mütecanis ve hutut-u esasiyede muttehidul-efkar olub hiçbir fırkaya mensub olmadığı gibi muhtelif siyasi grubların hiçbirine dahi temayül itmez fakat vatan ve memleketin sa'adet ve selametine ma'tuf olan gayede hepsinden mu'avenet-i ma'neviye intizarında bulunuyor. Eyyam-ı ahirede Anadolu'da zuhur eden ahval İzmir'in bigayr-ı hakkın işgaliyle onu takip eden vekayi-i feci'anın ve Anadolu vilayat-ı şarkiyesi mukadderatı hakkında işa'a idilen rivayatın efkar-ı ahalide hasıl ettiği teessürat neticesi olub maksad ise hukuk ve hudud-ı Osmaniyenin muhafazası olduğuna ve hükümet de şu hisde müşterek bulunduğuna binaen vuku'a gelen su-i tefehhümatın zevaline şu iştirak-ı hissi kafidir. Milletin büyük küçük hiçbir tabakasında ve memleketin hiçbir noktasında bu ulvi maksada mugayir bir fikir ve mülahazanın mevki olamayacağı aşikardır. Hususuyla hiss-i vatan ve hülus-u niyet ve samimiyet rehber-i hareket olunca su-i tefehhümatın ortadan kalkmamasına mani' bittabi' zail olur. Hükumetin düstur-ı asliyesi cümlece muta' olan kanun-i esasi ahkamıdır. İrade-i Milliyenin tecelligahı olan Meclis-i Meb'usanın sür'at-i mümkine ile celbi akdem-i vezaifimiz ve intihabatın kemal-i hürriyet ve selametle cereyanı ve mukadderat-ı memleketin vükela-yı millet vesatatıyla tayini ehass-ı amalimiz olduğundan intihabatın aksar tarikle icrası esbabına tevessül olunmuştur. Menafi-i hayatiye-i vatanın te'mini hükümetin yekvücud bir kitle teşkil eden millete istinaden konferans huzuruna çıkmasına mütevakkıf olmakla ihtilafatın tesirat-ı muzırra-i hariciyesi bütün vatandaşlar tarafından teslim idileceğinden hükümet mutma'indir. Şeref ve haysiyet-i Osmaniye memleketde hiss-i adalet ve müsavatın hükümran olmasında bulunmakla bila tefrik-i cins ve mezheb hiç kimsenin kanunen mahfuz olan hukuk-ı şahsiye ve medeniyesine bir guna ta'arruz vuku'a gelmemesine sarf-ı mesa'i idilecek ve muhafazası be-gayet mültezim olan intizam-ı ictima'iyeye asla halel getirilmemesine i'tina olunacakdır. Hükümet efkar-ı ammenin ma'kesi olan matbuatın memlekete büyük hizmetler ifa idebileceğine kani' ve herhalde menafi'-i vataniyeyi vikayeye her zamandan ziyade i'tina itmesine dahi muntazırdır. Masalih-i devletin hüsn-i cereyanı kavanin ve nizamat-ı mevcudenin tamamen tatbikine vabeste olmakla memurinin bu noktaya ale'd devam ri'ayetkar olmaları lazımdır. Hilaf-ı kanun ahval vuku' bulmuş ise bunların dahi yine kanun dairesinde tashihine musara'at olunacakdır. Wilson Prensiplerinden bi-hakkın istifade olunarak Devlet-i Osmaniyenin müttehid ve padişahının etrafında müctemi' bir düvel-i müstakile olarak te'min-i bekası için hiçbir teşebbüsden geri durulmayacakdır. Zaten düveli mu'azzamanın hissiyat-ı nısfetkaraneleri ve hakikata gettikçe nüfus etmekde olan Avrupa ve Amerika efkar-ı ammesinin i'tidal-perverliği de bu babda emniyet-bahşdır. İn'ıkad-ı sulhun bir an akdem tesri'iyle hal-i tereddüde nihayet verilmesi menafi'-i vatan icabından olmakla bu hususda dahi teşebbüsat-ı lazımeye ibtidar olunacakdır. 8-10-35 Dahiliye Nazırı Şerif - - - - - ❖ - - - - - Huzur-ı Celil-i Cenab-ı Sadaretpenahiye Hey'et-i celile-i vükela tarafından neşr edilip Dahiliye Nezaretince sureti vilayata ta'mim edilmiş olan beyanname-i resmi mutala'a-güzar-ı acizanemiz oldu. Vatan ve milletin bugüne kadar ma'ruz olduğu şerait-i tarihiyenin en tehlikelilerinden doğmuş bir vahdet-i milliyeye istinad eden teşkilat-ı kanuniye ve harekat-ı meşru'amızın sabık kabine tarafından su-i tefsir edilmesi şimdiye kadar hükümetin millete istinad itmesine ve milletden istifadesine mani' oluyordu. Tesirat-ı muzırrası malum olan bu su-i tefehhümün heyet-i celilelerince bu suretle izalesi ve hükümeti metalib ve amal-i milliye dairesinde idare-i umur ideceğinin ilanı bugünden itibaren milletle hükümeti gayr-ı kabil-i tefrik olacak bir suretde birleştirmiştir. Maksad-ı mukaddesimizin tahakkukunda en mühim amil olacak olan bu vahdet-i umumiyenin te'min buyurulmasından mütevellid şükran-ı milliyi tebrikat-ı mahsusamıza terdifen arz ideriz ferman. Anadolu ve Rumeli Müdafa'a-i Hukuk Cemiyeti Hey'et-i Temsiliyesi Adına Mustafa Kemal İrade-i Milliye Hey'et-i İstihbariyesi 1- Amal-i milliyeye muvafık bir kabinenin vaki' iktidara gelmesinden dolayı zat-ı hazret-i padişahiye teşekkürü havi Hey'et-i Temsiliye tarafından keşide idilen ariza-i telgrafiyeye cevaben zat-ı hazret-i padişahinin; zat-ı mülukaneleriyle makam-ı akdes-i hilafete karşı milletin te'yid-i ubudiyet ve sadakatinden fevkal'ade memnun olduklarını ve muvaffakiyeti du'a ettiklerini makam-ı sadaret-i uzma üçüncü sayfada sureti münderic telgrafname ile Hey'eti Temsiliyeye tebliğ etmiştir. 2- İrlanda'nın ilan-ı istiklal ettiği İngiltere'de, ma'den ve şimendüfer amelelerinin umumu grev ilan eyledikleri Roma'dan gelen bir telsiz telgrafdan anlaşılmıştır. 3- Yunanlıların Aydın havalisinde asker teşeyyüd ettikleri haber alınmıştır. 4- İzmir belediye reisi meb'usan intihabatı için hükümet-i merkeziyeden tahsisat taleb etmiştir. Tekmil Anadolu ve Rumeli'de teşkilat-ı milliyeye iltihak itmeyen hiçbir mevki kalmadığını ve tamamen vahdet-i milliyemizin te'min idildiğini tebşir ideriz. 10 Teşrin-i Evvel ∼∼∼∼∼∼∼∼∼∼∼∼∼∼ 1- İngiltere'de müdhiş bir suretde devam eden şimendüfer grevinin ahiren hitam bulduğu anlaşılmıştır. İngiltere'de sosyalizm cereyanları gettikçe şiddet kesb etmekdedir. Fransa'da ahval-i umumiye iyi değildir. Bir tarafdan bahalılık, diğer tarafdan şerait-i sulhiyeden adem-i memnuniyet ve harbin tevlid ettiği ızdırab ve sefalet er geç Fransa'da da gayr-ı muntazar vekayi'in zuhur ideceği hissini veriyor. 2- İtalya'da şa'ir-i meşhur Danonciv onbin kişilik bir kuvve-i milliye ile Feyume'yı işgal etmiştir. İtalya hükümet-i resmiyesi Avrupa mukarrarat-ı sulhiyesine ri'ayet etmek maksadıyla Danonçiv kuvvetlerini Feyume'dan çıkarmak üzere berri ve bahri asker sevk etmiş ise de bu kuvvetler de peyderpey Danonçiv'iye iltihak etmekdedir. Diğer tarafdan da Yugoslavlarla İtalyanlar arasında Feyume meselesinden dolayı yeni bir mücadelenin gayr-ı kabil-i ictinab olduğu zann olunuyor. Amerika reis-i cumhuru Wilson cenabları Feyume'nin Yugoslavlara aidiyetini, İtalya'nın bu arazide hakk-ı işgal ve hakimiyeti mevzu-u bahs olamayacağını iddi'a idiyor. Eğer diplomasi tariki ile Feyume meselesi hall idilemezse sulh-ı beşerin yeneden tehlikeye düşeceği muhtemeldir. 3- Fransa matbuatı sarih bir suretde İngiltere'nin aleyhinde icale-i kalem idiyor. En büyük parçayı İngilizlerin yutmak istediğinden bahs idiyorlar. Suriye meselesinde İngiltere'yi müsa'adekar davranmaya mecbur etmek için Fransız matbuatı yek avaz ve yek lisandır. İrade-i Milliyenin istihbarat-ı ahire-i mevsukasına nazaran Suriye'deki İngiliz kuvva-yı işgaliyesi yavaş yavaş çekilmekdedir. Diğer tarafdan alem-i arab hiçbir hükümetin taht-ı esaret ve hakimiyetinde kalamayacaklarını ve hatta istiklal-i millileri için böyle bir mecburiyet karşısında kalırlarsa şiddetle mücadele ve mukabele ideceklerini beyan idiyor. 4- Ma'ruzat-ı millete sed çeken hükümet-i sakıta zamanında kongre ma'ruzatını sedde-i mualla-yı hümayuna takdime tavassut buyuran a'yan-ı kiramdan Elena kahramanı müşir Fuad Paşa Hazretleri'ne Ferid Paşa kabinesinin yevm-i sükutundan akdem metalib-i milliyeyi arza muvaffak olduğundan dolayı arz-ı teşekkür edilmişti. Cevaben alınan telgraf ber vech-i zir nakl olunur. Padişahımız Efendimiz Hazretleri Hareket-i Milliye İçin Ne Buyuruyorlar? Mukaddemen sedde-i mualla-yı hümayuna arz olunmak üzere irsal buyurulan ma'ruzatın takdimine vesatatımdan dolayı layık olmadığım halde hakkımda izhar buyurulan tevcihat-ı alilerine arz-ı şükran iderim. Muharebat-ı mütekaddimede ifa ettiğim rivayet olunan hidemat bir şöhret-i kazibe mahsulüdür. Ben vatan ve milletime ifası her müslümanın mütehattim zimmeti olan bir vazife ifa ettim. Bu def'a da amal ve metalib-i milliyeyi hükümdar-ı teb'a-i perverimize arz etmekten başka bir hizmetim sebk itmedi. Metbu-u mu'azzamımız Hilafetpenah Efendimiz milli ordunun amal ve makasıdının her türlü şaibe-i tarafgiri ve fikr-i ihtirasdan beri ve yalnız selamet-i mülk ve milleti te'mine ma'tuf olduğundan esasen evvelce kani' olduklarını ferman buyurdular. Bugün aldığımız iltifatname-i telgrafilerine cevaben ma'ruzat-ı salife ve ihtiramat-ı ta'zimkaranemin lütfen kabulünü rica iderim. A'yandan Müşir Mehmed Fuad ෯ [Sivas Vilayet Matba'ası]