12 Ekim 1919 Tarihli İrade-i Milliye (Sivas) Gazetesi Sayfa 2
meşruiyetiyle teşkilatımızın nezahet-i ma'neviyesi hakkında mensub oldukları memleketler efkar-ı umumiyesini tenveren raporlar yazmaktan hali kalmadılar; bu suretle bugün Avrupa ve Amerika'da hakikatın inkişafa başladığını görmekle memnun oluyoruz. S- Alel-umum Müdafa'a-ı Hukuk Cemiyeti'nin ve alel-husus heyet-i temsiliyenin intihabat-ı ittibaındaki vaziyeti ve tarz-ı fa'aliyeti ne olacakdır? C- Cemiyetimiz bir fırka-i siyasiye değildir; bu sebeble intihabat esnasında ne ale'l 'umum cem'iyetin ve ne de ale'l husus heyet-i temsiliyenin doğrudan doğruya hiçbir fa'aliyet ve müdahalesi olmayacakdır; bu sebeble bu meselede bize terettüb eden vazife, hukuk-ı medeniyeden müstefid olan evlad-ı vatandan herhangi birine müterettib vazife-yi milliyenin devamı ile aynıdır. Yanlız bizim bu hususda fazla olarak söyleyebileceğimiz yegane bir söz varsa, o da milletin heyet-i umumiyesini temsil edip en mühim mukadderat-ı milliyemiz hakkında muayyen bir takım esasata malik olduğumuzdan, bu esasatı müdafa'a idecek ve bunlara tarafdar olacak bir ekseriyet-i meb'usan intihab edilmesini temenneden ibarettir. S- Zat-ı aliniz meb'usanlığa namzedliğinizi koyacak mısınız? C- Ben sırf vatan ve milletime böyle bir dakika-i tarihiyede tamamı ile hasr-ı vucud idebilmek gayesi ile meslek-i mukaddesimden ayrılub sine-i millete tevdi'-i mevcudiyet ettim; bunu yaparken ale-l'ade bir ferd-i millet olarak elimden gelen her fedakarlıkdan geri kalmamak azmindeyim; binalaleyh tamamı ile milletimin irade-i umumiyesine tabi' ve münkadım; eğer millet beni meb'us intihab etmek arzusunu izhar iderse ma'al-memnuniye kabul iderim; fakat kendiliğimden hiçbir teşebbüsde bulunmayacağım. - - - - - - - - oOo - - - - - - Hey'et-i Temsiliyeye Varit Olan Telgrafnameler Elbistan'dan: Teşkilat-ı vatan-perveranelerine umumen minnetdarlığımızı ve amal-i milliyeye muvafık suretde hareket idecek olan kabineye muzahir bulunacağımızı arz ile muvaffakiyetinizi Cenab-ı Hak'dan dileriz. Gökboza'dan: Bugün bilcümle ulema ve memurin-i hükümet ile eşraf-ı kaza Gökboza hükümet konağında bil ictima' menafi'-i mülk ve millete muvafık görülen kuva-yı milliye amaline iştirak ve iltihakı ittifak-ara ile kabul eylemişlerdir. Hatt-ı hareketimizin tavzih ve iş'arına himmet buyurulması ma'ruzdur. >Yenişehir'den: Ruh-ı milletden doğan harekat-ı milliyeye biz Yenişehir ahalisi kemal-i sururla iştirak eylediğimizi ve hükümet-i mahalliyenin müzaheret ideceği te'minatını arz iyleriz. Bilecik'den: Teşebbüsat-ı vataniye-i devletlerini tebrik ile kesb-i mübahat iyleriz. Bilecik'de teşkilat icrasına pek çok zaman evvel zemin ihzar edilmiş ve umum ahali makasıd-ı vatanperveranelerine zahir bulunmuştur. Karaman'dan: Karaman hareket-i milliyeye iştirak etmiştir ve memurin-i askeriye, kumandanlarıyla mütteheden haraket edilmekde olduğu ve lehulhamd muhill-i asayiş bir hal olmadığı. Söğüd'den: Millet ve memleketi kurtarmaya ma'tuf azminize hükümet başında olduğu halde Söğüd halkı umumen iltihak ile türbe-i Ertuğrul'da ruh-ı Ertuğrul'u şad idecek bir ahd-i peymane amadedir. Suşehri'nden: Milletin pak ve ma'sum sada-yı millisini padişahına arza hail olan Ferid Paşa'nın sukut ve Ali Rıza Paşa Hazretleri'nin kabineyi teşkil ettiğini tebşir buyuruyorsunuz. Vatan ve hükümeti kurtaran azim-i akdes mesa'inize halk ile beraber heyetimiz minnadarız ve zat-ı saminize ebediyen sarsılmaz bir azm-i vatanpervenare ile merbut kalacağız. Bi-lütfihi Te'ala maksad-ı mukaddes hakkındaki mesa'inize müyesser olarak Şerefli Koçhisar kazası heyet-i hükümetle eşraf belediye dairesinde bil ictima' kongre mukarraratını kabul hususunda muvaffakiyet hasıl olmuştur. Eskişehir'den: Elyevm Eskişehir hükümet ve ahalisi dahi kongre mukarraratını bil kabul İstanbul'a ol suretle telgraf keşide edilmiş olduğu arz ve amal-i milliyeyi temsil eden kongrenin muvaffakiyetini temenni iyleriz. Bozüyük'den: Kuva-yı milliyeye muzaheret ve iştiraka karar verdiğimiz ma'ruzdur. Daday'dan: Bugün 4 Teşrin-i Evvel sene 335'de Daday merkezinde icra kılınan ikibin kişilik bir mitingde cami'a-i islamiyeyi teşkil eden Osmanlı memaliki eczasının yekdiğerinden gayr-ı kabil-i infikak ve bir samimiyet-i tarihiye ile birbirlerine merbut kalacakları ve binaenaleyh Daday'da Müdafa'a-ı Hukuk-u Milliye merkezinin teşkil kılındığı her tarafça hüsn-i kabul-i mazhar olduğu vera-yı malumat ma'ruzdur. Gemlik: Türk vatanının halasını milletin sa'adetini, vatanın selamet-i atiyesini te'mine ve hilafet-i uzma-yı İslamiyenin i'la-yı şan ve şevketine hasr-ı amal eden Müdafa'a-ı Hukuk-ı Milliye Cemiyeti muhteremesinin mukarraratını necbe-i amal eden Gemlik'in ahali-i İslamiyesi bi'l-içtima kanun-u esasi meşrutiyet-i Osmaniyeyi ve bilhassa vahdet-i milliyemizi te'mine kafil olduğumuz mukarrarat-ı umumiyeyi harfiyen kabul iderek muhterem kuva-yı milliyeye iltihakını resmen ilan ider ve bu babdaki malumat ve evamire şiddetle intizar ettiğini bil-arz ihvan-ı cem'iyete arz-ı hürmet ve sadakat ideriz. Kayseri'den: (Suret) Sevgili padişahımız Efendimizin layezal bir sadakat ve ubudiyet ile merbut bulunduğumuz sedde-i seniye-i hilafetpenahilerine ref' ve i'la etmek istediğimiz feryad-ı ma'sumane ve vatan-perveranemiz, hakikatı zat-ı şahanelerinden saklamak cür'etinde bulunan kabine tarafından eb-i müşfik sevgili padişahımız Efendimiz Hazretleri'ne arz ve iblağ olunmamakda yapılmakda olan zulüm ve i'tisafa karşı meşru' hareket-i milliye ile mübarek vatanımız başdan başa sarsıldığı ve bu hareketin azameti ecanibin bile mazhar-ı takdiri olduğu halde Ferid Paşa kabinesi tarafından Sahan-ı Ulvi gibi hakaret-amiz bir dergide gösterilmekdedir. Bu kabinenin istihlas-ı vatan emrindeki kifayetsizliği derkar iken bir de ma'sum milletimizin katli'amıyla bi-gayr-ı hakkın itham edilmesine sebebiyet vermek ve cehli ve gabaveti yüzünden Toros'un şarkındaki ahalisi Türk olan vilayet ve sancakları bile unutmak ve mevki-i bülend-i resmiyesini takdir itmeyerek mülk-i mukaddes-i İslamiyeden krallıklar te'sisine tarafdar olmak ve hatta ismetimize en şeni' ve hunhar bir suretde saldıran Yunanlılara karşı mütarakenamedeki mevadda itimaten terk-i silah etmiş olan vatanın sırf namus-ı hayatını kurtarılmak ıztırarıyla orak ve bıçakla vuku' bulmakda olan mudafa'at-ı meşru'asını isyan mahiyetinde göstermek ve vatanın bu hal-i perişanisi ve takarrub eden teklike-i azimenin endişe-i elimi nazar-ı dikkate alarak mahza vatanın halası ve milletin istiklalini istihdaf ile bir kongre akdeden zümre-i güzide-i vatanperveran enzar-ı ammede menafi-i hasise takip eden ve serseri güruhu add ile bunların üzerine müretteb eşkıyalar tasallut etmek ve ittihaz ettiği bilcümle tedabir ve tertibatı da muhafaza-ı mevki ve menfa'at endişesini gaye idinerek ve hatta lehimizdeki mevaddının hiçbiri tatbik edilmeyen mütarekenameye istinad ve itibarla ağyarın mu'avenet-i muzırrasını taleb etmek gibi takip idilen bir siyaset-i sakime yüzünden Ferid Paşa kabinesinden milletin itimatı külliyen mütesellib olmuş ve binnetice mezkur kabine ile kat'-ı alaka edilmiştir. Mukaddes halife ve hakanımız sevgili vatanımızı bir buhrandan kurtarmak ve millet-i ma'sumeyi pek mühim kararlar ittihazına muztar bırakmak için daha ziyade idame-i mevcudiyetine müsa'ade buyurulmamasını sedde-i seniye-i mülukanelerinden fart-ı sadakat ve ubudiyetle arz ve istirhama cür'et iyleriz. Aksaray'dan: Bugün belediye dairesinde ulema ve eşraf-ı memleketle memurin-i hükümet bi'l ictima' cem'iyet-i muhteremenin nizamname-i dahiliyesi ile talimat ve sair evrak-ı muhabere kıraat ve irşadat-ı lazıme icra edilmiş ve cem'iyetin amali vataniyesine karşı umum tarafından asar-ı hoşnudi izhar ve sadrazam Ferid Paşa'nın iltizam eylediği muameleyi hamiyet-şikenane nefret ve la'netlerle yad edilmiş ve hemen kabinenin sür'ati iskatı sevgili padişahımıza ve lazım gelen makamata telgrafla arz edilmekle aynı cem'iyetde heyet-i idare dahi intihab olunarak vazife-i vatanperverlerine başlamış olmaları bera-yı malumat arz olunur. Osmancık'dan: Ferid Paşa kabinesine adem-i itimat tarihinden itibaren muntazam bir kuva-yi milliyenin teşkiline belediye reisi memur edilmişti. Vatan ve padişaha merbutiyet ve sadakat ibraz eden ahali-yi muhtereme kemal-i hahişle gönüllü kaydedilmiş ve bu suretle isbat-ı hamiyet etmişlerdir. Teşkil idilen kuva-yı milliye kumandanlığını müftü-i belde Mustafa Efendi der'uhde etmiştir. Günlerce sukutuna intizar olunan kabinenin sukut-u havadisi üzerine sabahlara kadar ilan-ı şadımani icra idildiği. Niğde'den: Ma'sum milletin ayakları altında kalan hakk-ı sarihini istirdad ve bi-gayr-ı hakkkın nasiyemize sürülmek istenilen lekelerden sıyanetin ve mevcudiyet-i milliyemizi anzar-ı umumiyede iskat etmek gibi nice nice fevaid-i azime istihsaline bezl-i makderet ve müteferrik bir halde bulunan ahali-yi İslamiyenin bir nokta-i meşru'ada tevhid-i amaline bezl-i inayet ve bir müddetden beri arzu-yı umumiye muhalif olarak sadaret mevkini cebren yed-i temellük inhisarında bulundurmakda muzır bulunan Ferid Paşa'nın levsinden makam-ı malumun avn-ı Bari ile tathirine muvaffak olmak şu garib milletin a'mak-ı ruhunda ila yevmi't tenad zeval bulmayacak suretde payidar olacakdır. Mülk ve milletin ihyasına masruf olan makasıd-ı celile-i atiyelerine kemal-i suhuletle muvaffakiyetleri eltaf-ı Bari'den temenni ile arz-ı tebrik ve ihtiram iyleriz. ∼∼∼∼∼∼∼∼∼∼∼∼∼ İstanbul Telgraf Başmüdüriyeti Vasıtasıyla Bilumum Muhabere Memurinine Teşkilat-ı milliye maksad-ı mukaddesini takip iderken en büyük hail olarak karşısında hükümet-i sakıtayı gördüğü halde büyük milletimizin necib evladından olan memurini devletin ve ale'l husus memleketimizin aksam-ı muhtelifesi beyninde vasıta-ı irtibat olan muhabere memurlarının her türlü şerait-i müşkileye rağmen amal-i meşru'amızı terviç itmesi vahdet-i milliyenin pek kıymetli bir amili olduğundan bütün millet namına cümlenizi tebrik ile arz-ı şükran iderim. 8-10-35 Rumeli Anadolu Müdafa'a-ı Hukuk Cemiyeti Hey'et-i Temsiliyesi Namına Mustafa Kemal ------------------------------ İrade-i Milliye Hey'et-i İstihbariyesi: Sivas - 11-10-35 1- İrlanda'nın ilan-ı istiklali şayi' olmuş ise de henüz müsbet bir malumat elde idilememiştir. Ma'mafih harekat-ı ihtilaliye devam etmekdedir. Times Gazetesi İngiltere hükümetinin bu harekatı teskin için iltizam ettiği şiddeti takbih etmekde ve bu şiddet devam ettiği takdirde vahim netayic tevlid eyleyeceğinden hükümete i'tidal tavsiye eylemekdedir. 2- İstanbul'daki düvel-i i'tilafiye mümessillerinin harekat-ı milliyemizi takdir ettikleri bir menba-ı mevsukdan istihbar edilmiştir. 3- Adana'dan alınan malumata nazaran İngiliz kuvve-i işgaliyesi onbeş Teşrin-i Evvel'de Adana'dan çekileceği ve emr-i asayiş ve işgali Fransızlara tevdi' ideceği müstahberdir. Üç Ermeni çetesi leylen fa'aliyete gelmekde ve polis ve jandarma elbisesi labis oldukları halde İslamlara tecavüzle emval ve eşyalarını iğtisab eylemekdedir. İslam memurini bu suretle tazyik ve istifaya mecbur idilerek yerlerine Ermeniler konulmakdadır. Polis müdüri Emin Bey azl olunarak yerine hat komiseri Muzaffer Bey'in katlinde medhaldar Vahan isminde birisi getirilmiştir. 4- Aydın cebhesinden yedi tarihinde gelen bir harb vapurunda mücahidin kıta'atı düşmana ta'arruzla mühim bir kuvveti ihata iderek kamilen imha etmiş ve Ataköy'de mevkine kadar ta'arruzun terakki ettirildiğini bildirmiştir. sekiz tarihli raporda da
