31 Ekim 1906 Tarihli Balkan (Filibe) Gazetesi Sayfa 3

Meb'us efendiler . Bu yaz bir intizam ve sükunetle icra idilen, kura heyet-i ihtiyariye intihabat-ı umumiyesi, ahalinin umur-u idarenin hüsn-ü ceryanından daha ziyade menfa'atdar olmağa başladığını irae etmekdedir. Memleketin geçen sene tebeyyün eden vaziyet-i maliyesi terakki ve eyülükde devam idiyor. Hükumat-ı ecnebiye ile akd idilen ticaret muahedeleri, sanayi', ticaret ve hırfet-i milliyenin terakki ve te'alisine pek büyük bir tesir-i memnuniyet bahşa icra eyliyor. Terakkiyat-ı maliyenin en mühim hadisatından ve memleketin te'alisine hadim yeni bir vesile-i hasenedir. Meb'us efendiler! Komşumuz olan imparatorlukda, (Hükumet-i Seniyye)deki milletdaşlarımızın vaziyeti, memleketimizde efkar-ı umumiyeyi galeyana getirerek, bu yaz, aksam-ı cenubiyesinde gayrı matlub birtakım vekayi'i badi oldu. Gerek dahil emaretde, gerekse haricdeki zarardidelere muavenet zımnında icab eden i'aneyi vermek suretiyle, hükumeti muhafaza ve asayiş ve intizam içün tedabir-i lazıme ittihaz etti. Meb'us efendiler! Hükumat-ı mücavere, Düvel-i Muazzama ve müstahlisimizle, Rusya ile münasebetimiz eyüdür. Bulgaristan'a Avrupa milel-i mütemeddinesinin en ümit bahşa bir a'zası ve pek mühim bir unsuru nazarıyla bakılmağa başlandığını memnuniyetle müşahede etmekdeyim. Vatanımız içün böyle bir fikrin takviyesi içün, memleketimizde sanayi', zira'at, ma'arif ve hırfetde tecelli eden terakki-'i seri' fevka'l mu'tad hidmat-ı tesirat-ı azimesi görülmüştür. Bunun gibi ordusunun terbiye ve istihzarat-ı harbiyesinde, maddi fedakarlığı diriğ itmeyerek, memleketinin emniyeti içün Bulgarların gösterdigi hissiyat-ı ilmiye-i vatanperverane dahi tesir-i mühim icra etmiştir. Mabadı yarın TELGRAF HAVADİSİ GİRİD 16 Teşrin-i Evvel, İstanbul'dan : § Yeni Vali Mösyö Zaimis vasıl olduğundan beri meb'usanda ve ahalide görülen heyecan epeyce sükunet buldu. Ahalinin galeyanı en ziyade Girit Adası'nda Avrupa kontrolüne karşı idi. Avrupalılar Girit palikaryalarının bu galeyanını atıfeten teskin içün, Girit idare-i maliyesinde, istikrazatdan başka bir hususda kontrol mevcud olmadığını ve yeni jandarma teşkilatı içün birtakım Yunan zabitleri celb idebilecegini te'min etmişler. "Balkan" Kap kapan dünyası bu, Bulgaristan'da Romanya'da bilad-ı sairede Rumlara karşı nefretler yağıyormuş; Kaç para ider? Palikaryalara Girit lazım, Girit'de içilecek Müslüman kanı lazım! ----------------oOo---------------- MAKEDONYA VUKUATI 15 Teşrin-i Evvel, Selanik'den : § Evvelki gün Kara Bina civarında bir Rum çetesinin etrafa sarkıntılığı duyulub mezkur mahalle gönderilen bir askeri müfrezesi komiteyi derhal muhasara etti. Yigirmi yedi kişeden ibaret olan bu çete askere teslim oldu ve cümlesi hayyen Selanik'e getirilmiştir. * * * 15 Teşrin-i Evvel, Manastır'dan : § Bundan dört gün evvel Manastır' mülhak Abbas-