28 Eylül 1919 Tarihli İrade-i Milliye (Sivas) Gazetesi Sayfa 4

(Sungurlu'dan) Bugün merkez kazada memurin-i hükümet ulema ve eşraf-ı memleket daire-i hükümetde bi'l içtima Ferid Paşa kabinesine mütteheden adem-i itimat beyan ve meşam-ı hilafetpenahi te'yid-i ra'iyye-i ubudiyet iderek atebe-i seniye-i tacdariye arz ve iblağ etmiş oldukları ma'ruzdur. 20-9-35 Ka-i makam Halit (Temellihan) Muhterem kongrenin bütün mukarrerat ve tebligatına biz Temellihan memurin ve eşraf ve mu'teberan ve ahalimiz la-yetezelzel bir iman ile inkıyad ve iştirakla vatan-ı mukaddesimizin ecanib-i gayr-ı meşru'a tecavüzünden muhafaza ve siyanete hadim bir kabinenin teşkilini ve efkar-ı sakimeye salik ve devam-ı hayat-ı millet-i islamiye ve Devlet-i Osmaniyenin inkırazını mucib bulunan hükümet-i hazıranın iskatını zat-ı hazret-i padişahiye arz ve müraca'atla istirham eylediğimizi ve bütün mevcudiyetimizle her fedakarlığa hazır ve müheyya bulunduğumuzu arz ile kesb-i fahr ve mübahat iyleriz. Umum Memurin Namına Salih Rahmi (İskilip'den) Kongrenin mukarrerat-ı müttehizesinin buraya da tebliği üzerine İskilib memurin ve ahalisinin dahi kongre mukarreratını bit-tasvib kabinenin şimdiye kadar takip ettiği mesleği mukarrerat-ı millete mugayir görüldüğünden ahali ve memurin mutteheden hükumet-i hazıraya adem-i itimat beyan ile du'a-yı ömr-i padişahı ref'-i bargah-ı ahadiyet kılındığının arz-ı atebe-i ulya kılındığı ma'ruzdur. Ka-i makam Tahsin (Mecidözü'den) Memleketi tehlike-i inkısamdan kurtarmak için hiçbir muvaffakiyet-i siyasiye te'min idemeyen ve irade-i milliye'yi tanımayan Ferid Paşa kabinesine kazanın memurini ve ahali ve eşrafı ile mutteheden adem-i itimat beyan eylediği ve keyfiyetin Dersa'adet'e yazıldığı. Ka-i makam Hasan (Alaca'dan) Millet-i Necibe-i Osmaniyenin sa'adet-i atiyesini te'mine hadim olamayan kabineden adem-i itimat telgrafla takdim-i atebe-i ulya kılınmıştır. Memurin ve eşraf ve bütün millet bugün kongre heyet-i muhteremesine herbir mevcudiyetle merbut bulunduğunu arz ile ta'zimat-ı mahsusamızın kabulünü tazarru ideriz. Tüccardan Şevki Ulemadan Sait Eşrafdan Asım Alaca Belediye Reisi Behçet (Tokat Nahiyesi'nden) Halife-i Muazzam Padişahımız Efendimiz Hazretlerine karşı fart-ı sadakat ve vatan ve milletin istihlası yolunda Sivas'ta mün'akid kongre mukarreratına bütün mal ve canımızla hazır ve her türlü emre amade bulunduğumuzu arz iyleriz. Eşrafdan Bekir Sıtkı Eşrafdan Cafer Sadık Ulema Namına Müderris Hacı Mustafa Tokat Nahiyesi Belediye Reisi Ahali Namına İsmail Eşrafdan Cami-i Kebir İmamı Hafız Şükrü (Araç'dan) Milletin kalbiyle müteharrik ve lisanıyla mütekellim olan heyet-i aliyyelerinin vatanın duçar olduğu tehlike-i inkısama sed çekmek hilafet-i seniyenin istiklalini te'min eylemek hususuna masruf olan harekat-ı müslimanane ve fedakaranesine iştirak itmeyecek bir ferd-i muvahhid yokdur. Sevgili padişahımız Efendimiz Hazretleri'ne derkar olan merbutiyet ve sadakatleri şükran ve minnetle bit-takdir bütün harekat ve icraat-ı vatanperveranenize her cihet muzahir olacağımıza vatan ve islamiyet namına arzını sermaye-i şeref ve mubahat biliriz. Cenab-ı Hak muvaffakiyetler ihsan buyursun. Aza Ziver Aza Osman Aza Halit Aza Ahmed Belediye Reisi İsmail (Çerkes'den) Siyaset-i vataniyeleri herkesçe malum ve eser-i fiiliyesi mertebe-i bedahete vasıl olmuş olan Ferid Paşa kabinesinin iskatıyla yerine amal-i milliye ve vataniyeye hadim bir kabinenin tayini ve ikamesi Çerkes kazası ahalisi namına rüesa ve memurin ve meşayih ve ulema ve eşraf-ı memleket tarafından atebe-i ulyaya arz ve hüsn-i muvaffakiyetlerini eltaf-ı ilahiyeden niyaz iyleriz. Ka-i makam Vekili Ali Rıza Kastamonu Valisi Hükümet-i merkeziye tarafından ahiren Kastamonu valiliğine tayin olunan Ali Rıza Bey'in Dersa'adet'den İnebolu'ya geldiğini ve mahall-i mezkurdan ahali tarafından İstanbul'a i'ade idildiğini yazmıştık. Mumaileyh vapurdan Zonguldak'a çıkarak oradan merkez-i vilayetle vali sıfatıyla muhabereye kıyam etmiş ise de yirmidört saat kaldığı Zonguldak'tan ahali tarafından vapurla Dersa'adet'e teb'id edilmiştir. § Hareket-i milliye Bolu'dan İzmit'e de sirayet etmiştir. Yakında fiili harekata intizar olunmakdadır. ∼∼∼∼∼∼∼∼∼∼∼∼∼∼∼∼∼∼∼∼ (Yozgad'dan) Zat-ı hazret-i hilafetpenahi ve kavanin-i mevzu'aya tamamıyla arz ve matbuat ve sadakat ider. Amalini nazar-ı dikkate almayarak milletin sevgili padişahına ma'ruzatda bulunmak hakk-ı meşru'unu isti'mal itmesine mani' olan ve Meclis-i Meb'usan'ı miad-ı kanunisinde içtima ettirmeyen kabineye adem-i itimat beyan iyleriz. Mühendis Mehmet Tahrirat Müdiri Besim Muhasebeci Arif Kadı Remzi Yozgad Mutasarrıfı Necib İsti'naf Müddei Umumisi Faik İstinaf Reisi Muhlis Ziraat Memuru Tevfik Posta Müdiri Selim Jandarma Kumandanı Ziya Tasfiye Memuru Ziya Bidayet Reisi Fehmi Ziraatbank Müdiri Hasan Defter-i Hakani Memuru Fehmi Telgraf Müfettişi Fuat Nüfus Memuru Mehmet Evkaf Memuru Cemal Duyun-ı umumiye Müdiri Kemal Jandarma Bölük K. Adil Muhacirin Memuru Osman Mekteb-i Sultani Müdiri Ahmed (Yozgad'dan) Dersa'adet'te İngiliz ve Fransız, İtalya, Amerika mümessil-i sasilerine Mecidiye kazasından yapılan telgraf sureti bera-yı malumat arzolunur. Telgraf Müdiri Halim Mezkur Telgrafname Sureti Sekiz ay evvel akdedilen mütarekede Osmanlı milletinin müstakil bir halde kalacağı ve hiçbir suretle memleketin işgal altına alınmayacağı te'min edilmişken bu cihet nazar-ı dikkate alınarak mütareke akd edilmişti. Mütarekenin akdinden sonra bu va'd kat'iyen nazar-ı itibara alınmayarak Osmanlı Milleti hakkında her şeyler reva görüldü. Bilhassa İzmir fecayi'i de bunu müeyyeddir. İcra-i hükümet eden kabine şu müddet zarfında milletin mazhar-ı teveccüh ve itimatı olamadı ve olamaz. Millet kendi işini ancak itimatına mazhar bir kabineye tevdi'a karar verildi. Vatanımızda bir ferd kalıncaya ve memleket harabezar halini alıncaya kadar refah ve sa'adet-i milliyemiz uğrunda çalışmaya azm etti. Mösyö Wilson prensibinin nazar-ı itibare alınarak bu adaletden müsta'id olunmaklığımızı ve bunun metbu'unuz olan hükümet-i mu'azzamaya arz ve iblağını rica iderim. 21-9-35 Mecidiye Belediye Reisi Hacı İbrahim - - - - - ☙ ❦ ❧ - - - - - Maarif Nezareti Maarif Nazırı Sa'id Beğ istifa etmiştir. Kabinenin Mevki'i Dersa'adet gazetelerinden bazıları kabine mevkinin tehlikeli olub yakında isti'fası me'mul bulunduğunu beyan idiyorlar. İzmir Fecayi'i Gelecek nüshadan itibaren vatanperveran tarafından cem' olunan vesaik sırası ile derc olunacakdır. İzmir Ey ulu Tanrım, Ulu Allahım, İki alemde tahassüngahım, Sana ben şimdi sığındım da derim, Hani evvelki hududumla yerim? Hani ırmaklı, dumanlı dağlar? Ulu Tanrım kalan aksamı koru! Yetmiyormuş gibi bunlar bir de, Uğradı İzmir'imiz bir derde; Orası can evidir her Türkün, Bunu, ey gasıb olanlar düşünün! İzmir'in toprağı Yunan ili mi? Alamaz kimse benim can evimi! Ne diyor; bak; bana birçok sesler: Hepimiz oldu şehid-i ekber! Sönmesin yurdumuzun bir ocağı, Kanımızla boyadık her bucağı, Ne büyük kaldı bu yolda ne küçük, Sizi ihya için öldük... öldük! Ölmeyi bilmeyen insan yaşamaz, Hakka kuvvetle tahakküm olamaz!. Müslüman yurduna Yunan çıkıyor, Hangi hakla bilmem Wilson'a sor! Haniya, Hak ve Hakikat nerede? Bu mudur adl-i siyasi bir de? Herkesin şimdi bu sestir zikri, Bundan artık dönmez kimse geri: Azmimiz öyle metindir ya Allah, Virmeyiz İzmir'i Allah Allah, Öldürün cümlemizi sonra salın, Çiğneyin naşımızı öyle alın, Kalsın ahvad-ı güzine sizden: Bir de tarih-i adaletde bu fen! ෯ Abone İrade-i Milliye Gazetesi Anadolu ve Rumeli Müdafa'a-ı Hukuk Sivas Cemiyet-i Merkeziyesi tarafından vatana bir hizmet-i mahsusa olmak ve efkar-ı milleti ahval-i cariye-i siyasiyeden haberdar eylemek için bin türlü müşkilata iktiham olunarak neşr idilebilmekdedir. Hey'et-i merkeziyenin bu babda ihtiyar eylediği fedakarlığa bil'umum ahalinin kısmen olsun iştirakla abone kayd olunacakları muntazırdır. Abone esmanı Ziraat Bankaları vasıtası ile irsal olunmalıdır. - Sivas - Müdir-i Mes'ul: Salahaddin