14 Eylül 1919 Tarihli İrade-i Milliye (Sivas) Gazetesi Sayfa 4
milliyemizi de ecanib nazarında keen lem yekun göstererek makasıd-ı ecnebiyeyi teshil idiyorlar. Maksad-ı ihanetkaranelerinde muvaffak olmak için milletin ruhunda doğan teşkilat-ı milliyeyi dağıtmak, devletin hakk-ı kazasını ecnebi ihtirasatına baziçe etmek, ordunun kuvvetini tenkiz içün mukdedir erkan-ı askeriyemizi azl ve düşmana teslim etmek şifreli muhaberat-ı askeriyenin çaldırılmasına Posta ve Telgraf Müdiriyeti umumiyesini selahiyetdar kılmak, bir takım düşman zabitlerinin memleket dahilinde dolaşarak vahdet-i mülkiyemizi ihlal idecek tahrikat-ı siyasiyede bulunmalarına müzaheret etmek, memleketi ihtilal içinde gösterüb müdahale-i ecnebiyeyi davet eylemek ve ordunun şifre muhaberatını men ile esrar-ı askeriyeyi ifşa cür'etinde bulunmak gibi her biri belli başlı bir cinayet-i milliye teşkil eden ahval-i gayr-i kanuniyeye tasaddi etmekten bir türlü sarf-ı nazar idemiyorlar. Ve hatta bu hale getiren ve mağlubiyetden mütevellid felaketimizi bu kadar tevsi' eden en büyük saikin hükümet-i hazıraca irtikab edilip duran bu ihanetler olduğu her halde artık nezd-i şevket ve fedd-i hümayunlarınca da teeyyüd etmiştir. Bu vaziyeti nazar-ı itibara alan heyet-i memlukanemiz vatanı kurtaracak son bir çare olmak üzere hiçbir fırka-i siyasiyeye mensub olmayacak ve irade-i milliyeyi tamamıyla izhar iderek millete istinad idecek bir heyet-i vükelanın re'skara getirilmesini tazarru' ve niyaz ile böyle bir kabine teşekkül itmediği takdirde milletin teşebbüsat ve icraat-ı zaruriyesini tevakkufa imkan olamıyacağını arzeder. Katıba-i ahvalde emr ü ferman sevgili padişahımız Efendimiz Hazretlerinindir. Sivas'ta Mün'akid Umumi Kongre Hey'eti ------------oOo------------ Havza'dan "Mustafa Kemal Paşa Hazretleri" Tarafından Zat-ı Şahaneye Keşide İdilen Ariza-ı Telgrafiye Mabeyn-i hümayun-ı mülukane başkitabet-i celilesi vasıtasıyla atebe-i hümayuna Cenab-ı Padişahiye Büyük milletin ve mukaddes hilafetin 'imad-ı sahih ve yeganesi bulunan saltanat-ı hümayunlarını Cenab-ı Hak masun-ı afat buyursun. Şevketpenahım: Memleketin bugün uğradığı afat-ı tazyik ve tehlike-i inkısam karşısında ancak zat-ı hümayunları başda olmak üzere milli mukaddes bir kudretin sahne-i mevcudiyeti vatanı ve istiklal-i devlet ve milleti ve hanedan-ı celil şanınızın altı buçuk asırlık mübeccel tarihi kurtarabilir. Her tarafça bu içtihat ve kanaat yektadır. Son huzur-ı şahanelerinde şerefmüsul buyurulduğumda İzmir vak'a-i müellimesinden pek mahzun olan kalb-i hümayunlarını bu nokta-i necata aid ilhamatı ve bu anda dahi hafıza ara-yı intibahımdır. İlka-yı milkdarilerinden mülhem azm-i iman ile vazife-i acizanemde müdavim bulunuyorum. İrade-i mülukaneleri veçhile sadrazam paşa kulunuzu, daima mehan-ı umurda tenver ve icabatını arz ve tatbik etmekdeyim. Şu bir ay zarfında hemen tekmil Anadolu-i şahanelerinin vilayat-ı elviye ve kazalarına ve hudud boylarına kadar efkar ve amal-ı milliye ve tekmil kumandanların ve tabakat memurlarının hissiyat ve icraatına vukuf ve nüfuz hasıl ettim. Bin-netice bariz bir suretde tahakkuk idiyor ki millet başdan aşağı uyanık olub istiklal-i millet ve devleti ve hukuk-ı aliye-i saltanat ve hilafeti te'yid için kavi bir azim ve iman ile mücehhez bulunuyor. İstanbul'da iken milletin bu kadar kuvvetli ve az vakitde felaketlerden bu derece müteyakkız olduğunu tahayyül idemezdim. Şevketpenahım: Bu evsaf ve vaziyetde ve zat-ı akdes-i hümayunlarına revabıtı layezal olan millet-i necibelerine tamamiyetle istinad ve bilmukabele bütün ma'nasıyla bu milli ve vicdani kuvvete muzaheret olunur. Son hatt-ı hümayunları umum milletin azim ve celadetini uyandırmıştır. Yalnız şayan-ı dikkat ve teessürdür ki bu nezih Anadolu halkı bugünkü hassas deverde bile İstanbul'da cari tahalüf ve münaferet-i efkardan ve ihtirasat-ı fitnekarından pek müteezzi bulunuyorlar. Filhakika İstanbul muhitinin müfesseh ahlakı ve bundan istifadeyi bilen ecnebiler devlet ve milletin imhası ve devlet ve millete ve padişahına sadakat ve fedakariyle hizmet kabiliyetinde olanları ortadan kaldırılması için pek ileri getmek cür'etini gösteriyorlar. Şevketmeabım: Hatırnişin-i milkdarileri olacakdır ki vazaif-i mevdu'amı ifası sırasında ecnebilerin ve bazı erbab-ı mefsedetin mutlaka tezverat ve mümane'atı ihtimalini daha Dersaadet'de iken cezm ile bunda ma'ruzatım meyanında ihsasa çalışmak ve bilhassa sadrazam paşa ile bazı rical-i mühimm-i devlete pek açık olarak teşrih ve böyle vaziyetler karşısında Ali İhsan ve Yakup Şevki Paşa kullarının akibetine giremiyeceğimi de ilave eylemiştim. İşte vicdan-ı millideki intibahat-ı ciddiye ve tecelliyat-ı cedideyi menfa'at-ı istilacuyanelerine münafi gören İngilizler ve vatanın zararına da olsa İngilizler'e mümaşatı meslek edinen zayıf seciyeliler bu kere acizlerini bi'l-iğfal İstanbul'a celbe teşebbüs idiyorlar. Hakan-ı Celil şanına, milletine, vatanına sadık ve bu uğurda ölümleri istihkar ile me'luf kulları gibi bir kumandandan elbette hukuk-u saltanat-ı hümayunlarının ve milletin beka ve mevcudiyetinin düşmanları olanlara mümaşatkarlık beklenemezdi. Binaenaleyh abd-i memlukleri bit-tab'i Malta'ya getmek ve yahut en hafif olarak hal-i atalete mahkum edilmek gibi ihtimaller karşısında bırakıldım. Ve bit-tab'i buna muvafakatda ma'zurum. Eğer icbar idilirsem memuriyet-i acizanemden istifa iderek kema kan Anadolu'da ve sine-i milletde kalacağım ve vezaif-i vataniyeme bu kere daha sarih hatvelerle devam ideceğim. Ta ki millet mazhar-ı istiklal ve saltanat ve hilafet-i mu'azzama-i hümayunları masun-ı indiras olsun. Layezal-i sadakat-ı abidanemin daima mütezayid olduğuna itimad-ı şahanelerini arz ve istirhama mücaseret eylediğim muhat-ı ilm-i ali buyuruldukda ol babda. Üçüncü Ordu Müfettişi Fahri Yaveri Hazret-i Şehriyarileri Mustafa Kemal - - - - - - - - ☙ ❦ ❧ - - - - - - - - Dahiliye Nazırı Adil Beyfendi'ye Zat-ı alileriyle Ma'muretul-Aziz Valisi Galib Bey (Ali Galib Bey) arasında teati olunan telgraflar kongre heyetince elde edilmekle aynen makam-ı vilayete tevdi' idildi. Bu telgrafların suretlerini zirde dercediyorum. Verdiğiniz emir Galib Bey'in der'uhde ettiği vazife doğrusu beht-i hayretimi mucib oldu. Bir tarafdan bendenizin infisalimin aslı olmadığını tebliğ ile şahsımı iğfal ve bir badire-i uzmaya ilka idiyorsunuz. Diğer tarafdan da müslümanları birbirine kırdırmak için tertibat-ı cinayetkaranede bulunuyorsunuz. Sizi bu türlü tertibata sevk eden sebeb nedir, bir türlü anlayamıyorum. Burada padişahına isyan etmiş bir kitle mi var idi ki eşkiyadan mürekkeb bir kuvve-i te'dibiye göndermeğe ihtiyac görüyorsunuz ve böyle vahi teşebbüsat-ı hainanenin mümkün'ül-icra olacağına nasıl kanaat edebiliyorsunuz? Evvel ve ahir arz ettiğim veçhile dahil-i vilayetde muhill-i sükun ve asayiş ufak bir hareket bile yokdur. Maksadınız Mustafa Kemal Paşa ile Rauf Bey'i tutmak ve kongreyi dağıtmak ise buna imkan olmadığını evvelce arz etmiştim. Şimdi yine bu iş için ahali arasında mukatele açmaya memleketi ateşe vermekle, büsbütün elden çıkarmağa sebeb olmak bin-netice vatan ve millete karşı ihanet cürmü teşkil ider. Bendeniz öyle anlıyorum ki zat-ı aliniz hırs-ı cah ile hakikati göremiyorsunuz ve hakikati söyleyenleri sevmiyorsunuz. Onları susdurmak ve ezmek istiyorsunuz. Bilerek yahut bilmeyerek düşmanların ekmeğine yağ sürüyor ve memleketi felakete sürüklüyorsunuz. Şu hal ve vaziyetde bulunan bir Nazıra artık itimatım kalmadı, bugüne kadar her mes'uliyeti şahsen der'uhde iderek idare-i umur ettim. Fakat bu dakikadan itibaren bendeniz makam-ı vilayetde iken Harput ve Malatya müslümanlarının Sivas müslümanlarıyla ve buradaki anasır-ı gayr-i müslime ve ecnebiye ile mukatele itmeleri gibi hazin ve hunin bir manzaraya tahammül idebilecek kadar vicdansız olmadığımdan buna müsa'ade idemeyeceğim, bu babdaki mes'uliyetin tamamen size raci olduğunu arzederim Efendim. 10. 9. 35 Sivas Valisi Reşid (Mehmet Reşit Paşa) ------------------- 10 gün evvel bir Amerika kruvazörü ile torpidosu birbirini takipen Trabzon'a gelerek demirlemiş ve yüz kadar Amerika askeri çıkararak şehri gezmiş ve ba'dehu avdet etmişlerdir. Gayr-ı muntazar olan bu seyahat Türklerin lehinde bir nümayiş ve ziyaret şeklinde telakki olunmuştur. 8. 9. 35 Erzurum ∼∼∼∼∼∼∼∼∼∼∼∼ Vesaik-i İhanet Kesret-i münderecat itibariyle bu nüshada neşredilmeyen ber vech-i ati vesaik gelecek nüshada aynen neşr olunacakdır. 1. Meclis-i vükela kararıyla dahiliye Nazırlarının müştereken imza edip Elaziz valisi firari Ali Galib'e gönderdikleri talimat-ı hafiye; 2. Masum Kürdleri tahrik ve teslih ve Sivas'a taarruz için teşvik zımnında sarf edilmek üzere jandarma tertibinden i'ta idilen tahkikat; 3. Ali Galib Bey'in dahiliye nezaretine cevabı ve aldığı emir cevabı; 4. Malatya mutasarrıfı Halil ve Emin'in Kürd rüesasından bazılarına şifreli daveti; 5. Hin-i firarlarında ahaliyi iğfal ve mukatele tevlidi için ittihaz ettikleri tedabir ve beyanat.
