8 Eylül 1906 Tarihli Balkan (Filibe) Gazetesi Sayfa 3

Rum meselesine dair Rum patriğinin almış olduğu vaziyetden bura Rumları bile hoşnud olmamakdadırlar. Hatta bu günlerde bazı Fener Rumları tarafından patriğin tahkir olunduğu işedilmekdedir. && Va'd olunmuş iken şimdiye kadar huzur-u şahaneye kabul edilmediğinden münfe'ıl ve muğber olan Amerika'nın İstanbul sefiri Layçman tercümanını yanına alub Bab-ı Aliye giderek Hariciye Nazırını protesto etmiş. Sultan, cülus münasebetiyle bütün cemaat-i Hiristiyaniye rüesasını kabul ettikden sonra Amerika hükümeti sefiri zat-ı şahanenin hastalığı münasebetiyle kabul olunamadığına dair verilen te'minatı kabulde ma'zur olduğunu protestonamesinde beyan etmiş. --------oOo-------- NECİB MELHAME ve PRENS FERDİNAND Sultanın itimat-ı tammını celb etmiş olan Necib Melhame Maryanbad'da İngiltere kralı ile görüştükden sonra Prens Ferdinand ve reis-i nüzzar Raçupetrof ile de mülakat etmiştir. Necib Melhame'nin gerek prens Ferdinand ve gerek Raçupetrof ile mülakatı hep Bulgaristan'ın icra ettiği tedarikat-ı harbiye hakkında imiş. Bulgaristan'ın tedarikat-ı harbiyesinden şikayet eden Sultan, tedarikat-ı mezbureye artık nihayet verilmesini istermiş. Necib Melhame'nin iş bu şikayetini dinleyen Prens Ferdinand ve Raçupetrof sultanın vekiline şiddetamiz cevablar vermişlerdir. && İstihbarat-ı mevsukaya nazaran Bulgarlardan şikayet yollu Rum patriği düvel-i mu'azzamaya ikinci def'a olarak bir muhtıra göndermiş. && Avrupa'ya Prens Ferdinand nezdine getmiş olan reis-i nüzzar Raçupetrof Sofya'ya avdet etmiştir. Muma ileyh Sofya istasyonuna iner inmez kendisiyle mülakat eden gazete muharrirlerinden birine makasıd-ı hafiyye ile fırka-ı muhalife tarafından buhran-u nüzzar mevcud olduğuna dair yazılan havadisin külliyen bi esas olduğunu kemal-i metanetle beyan ve ifade etmiştir. Raçupetrof'un her vakitden ziyade bu def'a prens hazretleri nezdinde haiz-i ehemmiyet olduğu Avrupa'da bulunduğu zaman geceli gündüzlü müşarün ileyh ile sofrada taam etmesi ve kendisine prens hazretleri tarafından elmas ile müzeyyen bir göğüs iğnesinin ihdasıyla sabettir. Reis-i nüzzarın Avrupa'ya gitmesi Bulgaristan'da zuhur eden Rum meselesi, Naçoviç'in isti'fası ve Türkiye ile ahiren gerginleşen Bulgaristan ile münasebatı hakkında prens hazretleri ile müzakere ve teati-i efkar eylemek içün imiş. Rivayete nazaran prens hazretleri Rum meselesi ile Türkiye ile Bulgaristan münasebatı hakkında reis-i nüzzar ile hem-efkar imiş. Kendine henüz daha halef bulunmayarak bila perva memuriyetden isti'fa ettiğinden dolayı Naçoviç'e hiddet etmiş. Hükümet-i hazıranın mürevvic-i efkarı olan Nuvek gazetesi, sözde Makedonya felaketzedeganına tevzi' edilmek üzere türlü türlü vesaite müraca'at ederek ahaleden para toplayub heva ve hevesine sarf eden bazı zorbaların türediğini ve eşraf-ı mezkurenin derdest olunub cezay-ı sezaları verilmesi içün polis idarelerine evamir-i şedide i'ta edildiğini ve bu babda kendilerinden para isteyenlerin derhal polise bildirilmeleri lüzumunu ahaliye beyan ve ihtar ederek Makedonya ahalisinin onların paralarına ihtiyacı olmadığını zikr eyledikden sonra ahali-i mezbureye yalnız hükümet-i hazıranın az bir müddet tarafında beşyüzbin frank tevzi' ve i'ta eylediğini beyan eylemekdedir. --------oOo-------- İSTANBUL'DAN MEKTUB Sultan Hamid'in hastalığı ağırlaşması İstanbul'da vaziyet-i siyasiyeyi müşkil bir hale kodu. Çünkü iradesiz görülemeyen birçok işler, bir çok muharrerat