1 Eylül 1906 Tarihli Balkan (Filibe) Gazetesi Sayfa 2

(akd oluna)cak itilafname-i ticari hakkında müteşekkil komisyon ikmal-i müzakere eylemiş olduğundan müzakeratı mutazammın evrak ve sairenin tebyizini müteakıb tarafınca sahh-ı keşide edileceğini yazmış idik. İstihsal eylediğimiz malumat-ı ahireye göre tebyiz muamelesi hitam bulmuştur. Mezkur komisyonda Bulgar murahhaslarının kitabet vazifesini ifa eden Stoyanof Efendi müzakeratı havi mukarraratın bir nüshasını müstashiben geçen gün Sofya'ya getmiştir. Mumaileyhin avdetini müteakıb sahh-ı keşidesi muamelesinin icrasını mukarrir bulunmuştur. ----oOo---- TELGRAF HAVADİSİ Yazacağımız şu havadisin mevsukiyetini iddia edemez isek de her türlü mes'uliyeti "el-Ahdetü ale'r-ravi" fehvasınca Veçerna Poşta Gazetesine atf u isnad eyleyerek mezkur gazetenin hususi telgrafnamelerini aynen tercüme edeceğiz: 17 Ağustos, İstanbul'dan: Hey'et-i vükela suret-i mahsusada ictima' edüb Türk ve Bulgar münasebtı hakkında gayet şiddetli ve gürültülü olarak müzakeratda bulunmuştur. Hey'et-i vikel erkanı beyninde ihtilaf-ı efkar mevcud ise de ekseriyet Bulgaristan ile muharebe edilmesi cihetinde olduğundan hududda tedarikat-ı harbiye icra edilmesine karar verilmiştir. Bunu müte'akib Bulgaristan hududuna mühinmmat-ı harbiye sevk olunması içün Bab-ı ali şarki şimendüfer kumpanyasıyla mukavelename akd etmiştir. Dünki gün ancak yüzyirmi vagon ile nakl ve sevk olunabilecek mühimmat-ı harbiye tedarik ve ihzar edilmiştir. Mühimmat ve levazımat-ı harbiye içün yetmişbeş vagon çifte lokomotifli iki tren ile Edirne'ye sevk olunmuştur. Mevsukan alınan habere göre mezkur vagonlardan 35 vagonu topcu bargiri diğerleri sahra topları ile mahmul imiş. İki gün sonra da mihimmat-ı harbiyeyi hamil iki trenin Edirne'ye gönderileceği mukarrerdir. & & Hükümet-i Osmaniyenin Yunanistan veyahut Romanya ile akd-ı ittifakı: Bu günlerde Yunanistan veyahut Romanya ile akd-ı ittifak edilmesi Yıldız mehafil-i siyasiyesince tasavvur olunmakda imiş. Türkite'nin böyle bir ittifak akd etmesine mütemayil ve hahişkar bulunması Bulgaristan ile zuhuru melhuz olan muharebeden korkusuna imiş. Bu fikir üzerine son heyet-i vükela ictima'ında da müzakere edilmiş ise de hiçbir güna mukarrerat i'ta edilememiştir. & Mevcud ve derdest tedarik bütün mühimmat-ı harbiyenin vakit zayi' edilmeyerek Edirne hududuna sevk ve irsal edilmesini ser'asker memurin-i aidesine emr etmiştir. & Rum patriki Bulgaristan prensine gönderdiği bir mektubda Bulgar milletiyle hükümeti tarafından Bulgaristan'da meskun Rum ahalisinin mal ve canına karşı edilen tacavüz ve ta'diyat tahammülün fevkinde olduğunu ve bundan sonra ne kanun-u ilahi ve ne de kanun-u beşere muvafık olmayan bu gibi ef'ale nihayet verilmesini şiddetli bir lisanla beyan ve rica eylemiştir. & Yunanistan hükümeti Atina'da bulunan Makedonit komitesine Makedonya'daki Bulgarlardan şiddetli intikamlar alınması içün bir büyük meblağ i'ta etmiştir. Keyfiyetden haberi olan düvel-i mu'azzamanın İstanbul(?) süferası Bab-ı ali nezdinde teşebbüsat-ı cedide de bulunmaları üzerine Rumların her türlü harekat ve mefsedetkaranelerine meydan verilmemesi içün Makedonya vali-i umumisi Hilmi Paşa'ya evamir-i lazıme i'ta ve tebliğ edilmiştir.